DOST mopalambo sa gagmay'ng negosyo

CEBU, Philippines - Gilusad sa Department of Science and Technology (DOST)7 ang programa   nga Small Enterprise Technology Upgrading Program (SETUP) aron labing mouswag ang maong sektor ug makatabang sa ekonomiya sa nasud.

Mao kini gipatin-aw ni Regional Director Rene Burt N. Llanto kinsa nagkanayon nga ang maong lakang maoy tubag sa ilang ahensya sa awhag ni Presidente Benigno Aquino III sa pagpalambo sa mga gagmay nga negosyante sa palibot sa nasud.

Dinhi sa rehiyon sa Central Visayas gipanglista na sa DOST ang gitawag nga small medium enterprise (SME) kinsa nakatabang   kaayo og dako sa suliran bahin sa pangimpleyo sanglit bisan gagmay sila apan nagkinahanglan sila og mga trabahante.

Busa matud pa ni Llanto nga aron molambo sila, ang DOST mosuporta kanila sa mga teknolohiyang gikinahanglan aron labi silang kasaligan ug molig-on sa pagpadagan sa ilang pamatigayon.

Giila ni Llanto ang pipila sa mga SME nga nagkinahanglan og ayuda sa DOST sama sa food processing, furniture, gifts , toys, housewares, natural fibers ug dyes, marine ug acquatic resources, horticulture, ug metals ug engineering.

Midugang si Llanto nga daghang aspeto sa maong mga negosyo ang kahatagan sa DOST og kauswagan, sama sa mga label, putos, mga sudlanan ug uban pa.

Aron labing molambo ang maong mga patigayon, dili lamang himoon silang panglokal nga negosyo, kundi ang gusto sa DOST mahimong de kalidad ang ilang mga produkto nga ikatubag sa panginahanglan sa mga merkado didto sa gawas sa nasud, sumala pa ni Llanto.  - BANAT NEWS