5 ka mananagat midagsa sa Biliran luwas

CEBU, Philippines - Luwas nga midagsa sa Maripippi Island sa Biliran Leyte ang lima sa pito ka mga mananagat nga nawagtang sa kadagatan   human malunod ang ilang pumpboat nga gisakyan gumikan sa bagyong Gener samtang naglawig sila sa kadagatan tali sa Kinatarkan ug isla sa Tangguinge   sa miaging Lunes sa buntag.

Alas 3:00 sa hapon niadtong Martes napalgan nga buhi   pa ang maong mga mananagat pinaagi sa mga sakop sa Bantay Dagat sa Marippipi Island. Gibutyag ni PO1 Juliemar Gilbuena sa Sta. Fe Police   Station   sa Banat News nga nasuta nila kini human madawat ang pahibawo gikan sa Office of the Civil Defense (OCD) sa Camp Roperto Cangleon sa Palo, Leyte nga luwas na ang maong lima ka mga mananagat.

Sa report sa Cebu Coast Guard giila nila ang lima nga mao sila si Emmanuel Padilla, 30, Marcelino Ablanya, 44, Mario Padilla, 40, Fruelan Abelda, 40 ug Benjie Sinapat, 32.

Sa pagkakaron nagpaabot na lang  ang maong mga mananagat nga mokalma ang mga bawod sa dagat aron makapauli sila sa Kinatarkan.

Gipapahuway lang una sila karon sa mga tinugyanan sa Coast Guard didto sa Biliran.

Si PO1 Gilbuena mikonpirmar kanila ni Emmanuel Padilla ug Benjie Sinapat nga mga molupyo sa Kinatarkan, Sta. Fe.

Midugang si PO1 Gilbuena ang maong lima ka mananagat kauban sa laing duha nga mananagat usab nga gidagsa didto sa Carnaza island sa lungsod sa Daanbantayan sa miaging buntag.

Matud ni PO1 Gilbuena   nga ang pito ka mananagat nagsakay sa usa ka pumpboat gikan sa Kinatarkan Island ug mipugos gayud og tabok paingon sa Tanggenggi Island ug dihang gilamba-lamba sila sa dagkong bawod nalunod ang ilang sakyanan sa dagat .

Apan nag-iyahay sila og luwas sa ilang kaugalingon hangtud nga nagkabuwag sila sa kadagatan. - BANAT NEWS