Karne di ipakaon ma-Lunes

CEBU, Philippines - Did-an na sa pagkaon og karne ang mga Filipino kun kaaprobahan sa kongreso ang balaod nga magpatuman sa Meatless Monday kon Lunes nga way karne.

Ang maong balaodnon nga nag-ung-ong pa karon sa kongreso gipangamahanan ni Kongresista   Teodoro “Teddy” Casiño, Jr. sa Bayan Muna Partylist. Si Casiño maoy pinasidunggang dinapit atol sa Nutrition Action Officers’ (NAO) Congress and 2012 Grand Nutrition Awards (GNA) unya sa Agosto 3 didto sa City Sports Club Cebu, sa Cardinal Rosales Avenue, Cebu Business Park, ning dakbayan sa Sugbo

Iyang ipalanog sa iyang mensahe ngadto sa mokabat sa 400 ka NAO nga maggikan sa   Bohol, Cebu, Negros Oriental and Siquijor nga motambong sa maong kalihokan. Si Casiño   nga nangamahan sa House Bill 6311 ang balaodnon nga mopatuman sa “meatless Monday” o Lunes nga way karne nag-awhag sa mga Filipino sa pagkaon og maayong matang sa pagkaon matag karon ug unya

Ang Meatless Monday usa ka international campaign nga nagdasig sa katawhan sa dili pagkaon og karne matag adlaw nga Lunes aron makabaton og maayong lawas ug kalikayan ang dagkong mga sakit   sama sa cancer, cardiovascular disease, diabetes, sobra ka tambok ug uban pa.

Si Dr. Parolita A. Mission, Nutrition Program Coordinator sa National Nutrition Council 7 (NNC 7) nagkanayon nga kining NAO Congress nga himoon niining ika-walo na ka tuig, iatol usab    sa ipahigayong regional nutrition awarding ceremony. 

Ning tuiga ang maong kalihokan giorganisa sa NNC 7 ug sa Regional Nutrition Committee kauban sa Nutrition Action Officers of the Philippines Association – Central Visayas (NAOPA – CV).

Kining maong kalihokan gitumong aron tigumon ang tanang nutrition action officers gikan sa mga lalawigan, siyudad, lungsod ug barangay sa tibuok rehiyon aron magkasabot sila bahin sa mga programa nga may labot sa nutrition.

Ang ika-8 nga Regional NAO Congress and 2012 Grand Nutrition Awards maoy magtak-op sa mga kalihokan sa usa ka buwan   nga kasaulogan sa 38th Nutrition Month sa buwan sa Hulyo 2012. (BANAT NEWS)