Lechon baboy di ipabiyahe kun way permit

CEBU, Philippines - Ang konseho sa dakbayan sa Talisay miawhag sa hepe sa Regional Quarantine sa pagpatuman sa ‘no meat inspection certificate, no transport clearance policy” sa mga karneng baboy ug mga inasal nga baboy nga ibiyahe ngadto sa Manila gikan sa dakbayan sa Talisay.

Giaprobahan kagahapon sa buntag atol sa regular session sa konseho sa Talisay ang resolusyon nga gipangamahanan ni Konsehal Edward Alesna, chairman sa committee on market and slaughter house nga nagdili pagpabiyahe sa mga inasal nga wala ma-inspection.

Matud ni Alesna nga nabantayan nila nga adunay mga karneng baboy ug   mga inasal nga baboy nga kanunay nga gibiyahe gikan sa Talisay ngadto sa Manila nga walay inspection certificates.

Ang mga produkto sa karne nga ibiyahe gikan sa usa ka rehiyon paingon ngadto sa laing rehiyon kinahanglang maggikan sa “Double A” o “Triple A” standard nga ihawan.

Apan si Konsehal Romeo Villarante sa oposisyon nagkanayon nga ang maong lakang ni Alesna makaapekto sa mga negosyante og inasal baboy tungod kay kinahanglan nga dili malangan sa biyahe ang ilang produkto.

Matud niya nga maayo unta og gipatawag niya ang mga negosyante og mga inasal baboy aron makahibawo sa maong sistema ug makapangandam.

Si Villarante nagkanayon usab nga maayo unta nga organisahon sa siyudad ang ihawan nga butangan og fast lane alang sa mga dinaliang karne.

Apan si Alesna sa iyang bahin, nagkanayon nga dili na kinahanglang ipatawag pa ang mga negosyante og inasal tungod kay ang gipasar nila dili man ordinansa, kay usa man lang ka resolusyon.

Gibutyag ni Alesna nga nabantayan sa buhatan sa city veterinarian nga diyutay   ra ang magpaihaw og hayop sa ihawan nga para inasal, apan daghang inasal baboy nga gibiyahe paingon sa gawas sa Sugbo.

Gipasabot ni Alesna nga dili lang dakbayan sa Talisay ang angayang mokuha og permit kundi lakip na ang mga silingang dakbayan kinsa dili mga double A ang standard sa ilang ihawan.

Midugang si Alesna nga ang maong lakang makahatag kini og pabor sa dakbayan sa Talisay ug masiguro usab nga ang mga karneng gipamiyahe ngadto sa ubang lugar sa nasud gikan sa Talisay dili makadaot sa panglawas sa konsumedor. (BANAT NEWS)