443 anibersaryo sa Kapitolyo sugdan karon

CEBU, Philippines - Buksan na karong adlawa ang usa ka buwang kalihukan sa pagsaulog sa ika-443 nga founding anniversary sa lalawigan sa Sugbo. Ang founding anniversary unya pa sa Agosto 6 nga usa ka special non-working holiday sa tibuok lalawigan sa Sugbo lakip na sa dakbayan sa Sugbo pinasubay sa Republic Act 8952.

Matud pa ni Elizabeth Francia, chief of staff sa Office of the Governor, nga susama ra ang mga kalihukan karong tuiga sa miaging tuig.

Buksan usab karong adlawa ang Agro-Fair ug Photo Exhibits ug ilusad ang ubang programa sama sa Air Soft, Horse Show, Volleyball, Obra Negosyo Eskwela, Turismo Sugbo ug e-Gwen sa Capitol Social Hall.

Ang Agro-Fair molungtad hangtud sa Agosto 6 nga anaa sa nataran sa Kapitolyo. Sa Lunes, Agosto 6, usa ka Santos nga Misa ang himoon alas-10 sa buntag ug ang programa ipahigayun sa hapon diin si Gob. Gwendolyn Garcia mopadangat sa iyang anniversary message ug ubang pahibawo.

Daghan pang kalihukan ang ipahigayon sa Kapitolyo ug sa Cebu International Convention Center hangtud tapos ning buwana nga naglakip ang nabantog nga Pasigarbo sa Sugbo Festival of Festivals karong Agosto 11 sa CICC.

Ang paghatag sa premyo sa mga mananaug sa Pasigarbo ug sa e-Gwen winners ipahigayon sa August 13 sa CICC gihapon. (BANAT NEWS)