CEBU, Philippines - Usa ka 70-anyos nga pasahero sa barko nga paingon untang motambong og family reunion sa isla sa Bantayan ang namatay tungatunga sa biyahe samtang naglain ang panahon niadtong Sabado sa hapon.
Patay nang nadangat sa Bantayan District Hospital si Ana Maria Mendoza Suacillo, 70, taga Don Jose Avila sa barangay Capitol Site ning dakbayan sa Sugbo.
Siya uban ang iyang mga sakop sa pamilya nga misakay sa Hagnaya Wharf sa lungsod sa San Remegio sa lantsa paingon sa isla sa Bantayan, motambong unta sila sa ilang reunion diha sa Bojong Beach Resort sa lungsod sa Sta. Fe.
Matud pa sa kabanay sa biktima nga nagdumili lang pagpaila sa iyang pangalan dihang nahinabi sa Banat News nga samtang nagbiyahe gikusokuso sa dagkong balod ug kusog nga huros sa hangin ang ilang gisakyan.
Tungod sa pagkilingkiling sa lantsa sumala pa sa nakahinabi sa Banat News nalisang og maayo si Suacillo ug dihadiha gihubak ug nawad-an og panimuot ug gitabang sa mga tripulante.
Pag-abot sa pantalan gidiretso kini og sakyanan ug gidala sa Bantayan District Hospital mga alas 3:10 sa hapon. Apan si Dr. Edgar Abelgas sa Bantayan District Hospital dihang nahinabi sa Banat News nga maoy nag-atiman niadto kang Suacillo mideklarar nga patay na kini pag-abot kanila.
Si Abelgas mibutyag nga ang nerbiyos mahimong hinungdan nga atakihon sa hubak o ubang balatian ang biktima. Si Roy Mendoza, staff sa Bantayan District Hospital miingon nga gikuha na sa mga kabanay ang patay’ng lawas ni Suacillo aron dad-on og balik sa dakbayan sa Sugbo.
Nianang adlawa naglain ang kahimtang sa panahon sa Central Visayas tungod sa hinungaw sa bagyong Gener nga miigo sa Luzon nga nakapakusog sa hanging habagat. (BANAT NEWS)