Kahanas sa minibus drivers gisusi sa TESDA

CEBU, Philippines - Gipahigayon kagahapong adlawa ang actual assessment sa mga drayber sa minibus sa habagatang bahin sa lalawigan sa Sugbo aron masuta kung hanas ba gyud silang magmaneho.

Ang presidente sa Cebu Minibus Operators nga si Julie Flores mibutyag sa diha nga nahinabi sa Banat News nga adunay 27 ka mga drayber sa minibus kagahapong adlawa ang gipaubos sa actual assessment.

Matud pa ni Flores nga ang actual assessment usa ka pamaagi sa Technical Education Skills Development Administration (TESDA) aron matino ang kaluwasan sa mga pasahero.

Dugang pa ni Flores nga kun ugaling makapasar sa actual assessment ang usa ka drayber hatagan kini og lisensya sa TESDA nga magmatuod nga nakapasar siya sa maong assessment.

Butyag usab ni Flores nga ang lisensya o sertipiko nga ihatag sa TESDA mamahimong magamit sa mga drivers kun ugaling molarga kini sila og gawas aron manarbaho isip mga drayber. Nanghinaot si Flores nga unta makapasar ang 27 ka mga draybers nga maoy unang mipaubos sa actual assessment.

Sa nasayran niadtong Hulyo 19 mipaubos usab sa training seminar ang 188 ka mga minibus drivers, human niini ang actual assessment. Tumong niini nga matanom sa alimpatakan ug batasanon sa mga drayber nga unahon ang kaluwasan sa ilang mga pasahero.

Ang mga nakuhang sertipiko sa mga drayber nga nakapasar sa TESDA assessment gamiton usab nga rekisito sa mga operators sa ilang pag-renew unya sa ilang mga prangkisa. (BANAT NEWS)