5 ka pribadong ihawan gipasirad-an

MANILA, Philippines - Lima ka pribadong ihawan ang gipasirad-an sa Cebu City Hall gumikan sa kakuwang    niini sa tukmang pasilidad.

Ang maong mga ihawan nahimutang sa Barangay Lahug, Inayawan, Punta Princesa, Mambaling ug Labangon.

Matud pa sa head sa Department of Veterinary Medicine and Fisheries nga si Dr. Alice Utlang ,nga kanunay gyud nilang gimonitor ang 31 ka pribadong ihawan sa Siyudad sa Sugbo ug nasuta nila nga ang lima niini wala magtinarong sa paglimpiyo sa ilang ihawan.

May uban usab niini nga may mangingihaw nga wala marehistro sa buhatan sa DVMF busa delikado kaayo kun masakiton sila motapot sa karne ang ilang sakit   hangtod ngadto sa publiko nga makakaon sa maong karne.

Gihimo sa DVMF nga hilom ang ilang pagpang-inspeksyon sa mga ihawan aron masuta gyud ang tinuoray nga estado niini.

Matud pa niya nga importante kaayo nga limpiyo ang ihawan aron dili mataptan og kagaw ang mga karne nga gihikay niini.

Samtang gihingusgan usab karon sa DVMF ang kampanya sa paggamit sa tukmang sakyanan   sama sa refrigerated van o   sakyanan nga adunay freezer, o ba kaha mga kahon kon ice box aron bugnaw kanunay ang mga karne. (BANAT NEWS)