Molupyo sa Talisay nagdumili pagbiya sa balay

CEBU, Philippines - Bisan og nahimutang na sa peligro ang ilang kinabuhi, mga residente sa sitio Kalubihan, barangay Poblacion, dakbayan sa Talisay nagdumili gihapon sa pagbiya sa ilang mga pinuy-anan tungod kay nawili sa ilang gagmay’ng kabtangan.

Si Kagawad Gabriel Bonjoc sa Poblacion nga nahinabi sa Banat News kagahapon mibutyag nga sobra sa 10 ka pamilya ang ilang gi-rescue kagahapon sa buntag lakip ang 10 ka mga bata kinsa natanggong na sa bawod.

Matud ni Bonjoc nga nagkutay sila og pisi nga maoy gigunitan sa mga natanggong sa bawod aron kini makagawas sa ilang balay.

Sa milabay’ng adlaw gipabakwit na ang mga pamilya nga nagpuyo sa daplin sa baybayon aron malikay sila sa disgrasya.

Apan matud ni Bonjoc nga nagdumili sa pagbakwit ang maong mga molupyo kay nawili kini sa ilang mga kabtangan basin pangawaton.

Ang mga namakwit temporaryo nga gipahimutang sa covered court kilid sa simbahan sa Santa Rita de Avila sa Poblacion.

Ang barangay maoy nagluto og pagkaon kagahapon alang sa mga biktima.

Si Marivic Dazon, 49, residente sa sitio Kalubihan mibutyag sa Banat News nga kagahapon sa alas 7:00 sa buntag mikusog ang bawod diin lima ka mga cottage ang nabungkag ug lima usab ka punoan sa lubi ang nangatumba.

Matud niya nga ang maong sitwasyon maoy unang higayon nga pwerting kusoga sa bawod.

Ang mga residente sa sitio Kalubihan nanghangyo sa siyudad nga pataoran usab ang ilang lugar og sea wall aron adunay makasagang sa bawod kung magdaot ang panahon.

Apan tungod sa kakusog sa bawod ang sea wall sa habig sa sitio Litmon sa barangay Dumlog nangliki

Si Konsehal Rodil Cabigas, committee chairman sa infrastructure mibutyag sa mga tigbalita nga gipasusi pa nila sa city engineering ang lugar aron makagama og assessment.

Kagahapon sa hapon ang city social welfare gitakdang mag-apod-apod og bugas, sardinas ug mga relief goods ngadto sa mga biktima.

Sa habig sa barangay Poblacion ang sitio Asan, Kalubihan ug Litmon maoy naapektohan sa dagkung bawod.

Sa laing bahin, base sa talaan sa CSW sa barangay Dumlog mikabat sa 16 ka pamilya ang naapektohan nga gilangkuban sa 96 ka mga tawo, 16 ka mga balay usab ang nangaguba.

Sa barangay Poblacion 78 ka pamilya nga gilangkuban sa 402 ka tawo maoy apektado ug may 81 ka balay igo lang mibahirig samtang   lima ang hingpit gyud nga nagusbat

Sa barangay Cansojong, 26 ka pamilya nga gilangkuban sa 86 ka mga tawo ang apektado ug adunay 11 ka balay ang hingpit nga naguba ug walo ang igo lang mibahirig, usa ka pump boat ug unom ka baroto ang nangaguba.

Sa barangay Biasong, tulo ka pamilya ang naapektohan, usa ka balay ang mitakilid ug duha ang hingpit gyud nga natumpag.

Sa barangay Tanke, upat ka pamilya nga gilangkuban sa 18 ka tawo ang apektado, usa ka balay ang hingpit nga nagusbat ug usa ka pump boat ug usa ka baroto ang nangaguba usab.

Sa barangay San Roque, 17 ka pamilya nga gilangkuban sa 100 ka tawo ang apektado, 11 ka balay ang igo lang mibahirig, samtang lima ka pukot ug usa ka pump boat ang nangaguba. (BANAT NEWS)