CEBU, Philippines - Gumikan sa padayong pagsaka sa kaso sa nataptan og dengue sa siyudad sa Sugbo, gilusad sa City Health Department ang Little Junior Brigade nga gilangkoban sa mga tinun-an sa nagkadaiyang pampublikong tunghaan sa dakbayan.
Sumala pa ni Assistant City Epidemiologist Durinda Macasucol nga grade 6 ang kasagarang miyembro sa maong grupo nga motabang og paniid sa palibot sa ilang tunghaan kung dunay mga nagpundong tubig ug sila mismo molimpyo niini.
Ang Little Junior Brigade usab maoy mangulo sa gitawag nila nga “4 oclock habit” kung diin ang mga tinun-an manglimpiyo sa ilang mga classrooms.
Kahinumduman nga lapad nga kampanya ang gibuhat karon sa siyudad batok sa sakit nga dengue ilabi na nga kapin sa 100% ang pagsaka sa kaso niini karong tuiga kumpara sa miaging tuig. Duna nay 25 ka barangay sa siyudad ang gideklarar nga dunay dengue outbreak niadtong milabay’ng semana.
Pipila sa mga sintomas sa dengue mao ang taas kaayong hilanat ug ang pagdugo sa ilong, mata ug dunggan ug ang pagpanggawas sa mga rashes sa tibuok lawas ug ang uban makalibang og dugo.
Base sa talaan sa City Epidemiology Statistics and Surveillance Unit (CESSU) sa City Health Department, 1,677 ka kaso na ang natala sukad niadtong Enero hangtod sa unang bahin sa Hulyo niining tuiga diin pito na ang patay. (BANAT NEWS)