CEBU, Philippines - Mokabat sa P4 milyones nga kantidad sa sakyanan sa dagat ug mga motorsiklo (big bikes) ang nasakmit sa mga sakop sa Customs Port of Cebu sa milabay’ng adlaw.
Personal nga gisaksihan ni BOC Commissioner Ruffino "Ruffy" Biazon ug Deputy Commissioner for Internal Administration Group Jose Lorenzo Tanada uban ni Cebu Customs Collector Atty. Ronnie Silvestre ang pagsusi sa usa ka 20-footer container van nga una nang gidudahang ang sulod mga kontrabando gikan sa nasud sa Australia.
Base sa eksaminasyon sa Customs Police gideklarar nga ‘personal effects’ ang sulod sa maong container van nga gipanag-iya sa usa ka William Kupers nga miabot niadtong Hulyo 25, 2012.
Apan nasuta nga speed boat, Isuzu big bike - 1000 CC, Yamaha Virago-750 CC, TMX Dirt Bike- 125 CC nga gibanabanang nagkantidad og P4 milyones ang sulod niini.
Matud pa ni Biazon napakyas si Kupers sa pagpakita sa ilang import permit.
Wala niini pagdeklarar sa tinud-anay nga sulod sa maong container van hinungdan sa pagpagawas og Warrant of Seizure and Detention sa maong kargamento.
Si Biazon miingon nga usa kini ka mensahe ngadto sa mga langyaw nga buot mopalusot sa ilang mga kargamento dinhi sa nasud nga seryoso ang gobiyerno batok sa smuggling. (BANAT NEWS)