100 Balay gidaro sa gianod nga barge

CEBU, Philippines - Gibanabanang usa ka gatos ka balay ang nangaguba human daroha sa duha ka gianod nga barges diha sa Tondo, Manila atol sa pagbunok sa uwan dinala sa bagyong Gener niadtong Domingo sa gabii.

Ang kusog nga uwan ug hangin nagdala og pagbaha sa lapad nga bahin sa Luzon ilabi na sa Metro Manila ug pipila ka domestic flights ang gikanselar tungod sa kadautan sa panahon.

Sumala pa sa report, ang duha ka barges giangkorahe sa Manila-Bay apan tungod sa kakusog sa hangin ug bawod natangtang kini sa pagkaangkorahe ug gianod.

Ang usa ka barge 50 ka tiil ang gilapdon samtang ang usa 15 ka tiil ang gilapdon midaro sa kabalayan nga sagad ginama sa gaay sa Carnation Street sa Barangay 105 niadtong Domingo sa gabii.

Wala hinuoy gikatahong nasakitan sa mga molupyo sa maong hitabo,apan atol ning pagsulat sa balita duha ka watchers sa usa sa mga barge ang na-missing gikan sa pagkaanod. Pito ka mga lugar sa Luzon ang gikonsiderar nga naa sa peligro alang sa mga molupyo sumala pa sa Philippine Atmospheric Geophysical and Astronomical Services Administration (PAGASA).

Ang 11 a.m. advisory sa PAGASA mipahibalo nga namentinar sa Gener ang pwersa niini nga nagdala og 105 kph nga hangin diha sa sentro ug huyohoy nga 135 kph.

Matud pa ni PAGASA forecaster Fernando Cada posibleng kutob pa sa adlaw’ng Huwebes ang maong bagyo dinhi sa sulod sa teritoryo sa Pilipinas.

"Huwebes pa, bumagal ito, 11 kph ang galaw. Made-delay ang paglabas niya ng Philippine area of responsibility," matud pang Cada sa interbyu sa dzBB radio nga gikutlo sa GMA News Online. Ang mga dapit nga gibutang sa Storm Signal No. 2 mao ang Cagayan; Calayan; Babuyan ug Batanes samtang Signal No. 1 ang Isabela; Kalinga ug Apayao.

Mipasidaan ang Pagasa nga mas mokusog pa ang hanging habagat tungod ni Gener ug magdala kini og daghang ulan nga may kasarangang huros sa hangin sa Luzon ug Visayas.

Ang mga molupyo sa mga ubos nga lugar ug kilid sa kabukiran gipasidan-ang magmabinantayon sa posibleng mahitabong flash floods ug landslides. Samtang kadtong namuyo sa kabaybayonan kinahanglang magmatngon sa mga dagkong balod. (BANAT NEWS)