Paghipos sa basura di pa perpekto - Llanto

CEBU, Philippines -  Dili pa perpekto ang mga paagi sa kagamhanan sa pagdumala sa basura o waste management ning dakbayan apan nag-anam na sa iyang kahingpitan.

Mao kini ang panlangtaw ni Regional Director Rene Burt N. Llanto sa Department of Science and Technology (DOST)7 sa pagbukas kagahapon sa tulo ka adlaw nga Science and Technology Conference nga matapos unya sa Miyerkules, Agosto 1, 2012.

Matud pa ni Llanto nga   may nakat-onan nang dyutay ang publiko sa pag-atiman sa basura niini, sama niining pagbahig sa basura nga malata ug di malata.

Ang dili na pagpasagad paglabay sa ilang basura, usa sa kamatuoran o sinyas nga may nakat-onan na ang katawhan sa pag-amping sa ilang basura.

Apan sama sa ubang nasud kansang mga molupyo anaa na sa kahingpitan sa pagdumala sa ilang tagsa-tagsa ka basura maoy gipaabot ni Llanto nga  makab-ot sa tanang mga molupyo dinhi sa rehiyon.

Iyang gihimong pananglitan ang kadesiplinado sa mga molupyo sa New Zealand diin ang katawhan na   maoy mohatod ug molabay sa ilang basura ngadto sa basurahan sa matag distrito.

Busa  ang kagamhanan didto wala na mamalit pa og trak sa basurahan tungod kay ang matag panimalay gitudloan sa gobiyerno sa responsibilidad niini sa paglabay sa ilang basura   ngadto sa basurahan sa kagamhanan.

Miingon si Llanto nga  ang mga molupyo ning rehiyon sama pa sa bata nga mao pay pagkat-on sa paglakaw nga kinahanglang agakon aron dili matumba, ug kun kaantigo na kining molakaw mahimo na silang buhian nga mag-inusara ug dili na matikwang.

Sa pagkakaron gigiyahan pa sa kagamhanan ang mga molupyo sa pagtigom sa basura niini sa ilang panimalay aron kini hakuton sa mga    trak sa   basura nga iya sa kagamhanan. Apan ngadto-ngadto kun makahimo na kini sa paglabay sa ilang kaugalingong basura ngadto sa basurahan sa siyudad, anha na maisip nga perpekto na ang kagamhanan sa pagpatuman sa iyang waste management program, matud pa ni Llanto. (BANAT NEWS)