CH extension ibutang sa Banawa-Englis

CEBU, Philippines - Patukoran ni Mayor Michael Rama og City Hall satellite office ang dapit sa Banawa ug Englis sa Barangay Guadalupe aron dali ra nga makadawat sa mga basic services ang   mga residente sa maong dapit.

Si Rama nagkanayon nga ang usa ka executive order kalabot niini luwatan sa iyang buhatan aron ang City Hall direktamenting manginlabot sa pagdumala sa Banawa ug Englis.

Ang maong extension office sa city hall maoy magsilbi nga dangpanan sa unsa mang mga butang nga gikinahanglan nila. Matud pa ni Rama nga mangita na sila karon og building nga maoy abangan sa siyudad ug maoy silbing extension sa city hall sa nahisgutang dapit.

Nagkanayon ang mayor nga nakab-ot kini sa iyang huna-huna isip tubag sa gipangayo sa mga tawo nga hustong serbisyo gikan sa kagamhanan sa dakbayan nga wala nila madawat nga maoy hinungdan nga gusto na lang nilang mobuwag gikan sa barangay Guadalupe.

Giangkon sa mayor nga dako gyud ang Guadalupe busa nagkinahanglan kini og dugang action center nga moatiman sa mga tawo. Kahinumdoman nga wala madayon pagbuak ang maong barangay human modaug ang “No” sa plebisito sa miaging Sabado.

Si Rama nga mipabor nga buakon ang Guadalupe miklaro nga iyang gitahod ang resulta sa plebisito sanglit mao kini ang tingog sa katawhan.

Gipadayag sa mayor nga ang mga trak na sa siyudad maoy nangolekta sa mga basura sa Banawa ug Englis.

Sayo niini gipadayag ni kapitan Michael Gacasan sa Guadalupe nga unom ra ka trak sa basura ang nagdagan sa pagkakaron sa ilang barangay kay nangaguba ang uban nga maoy hinungdan nga dili na niya maatiman pa ang mga basura sa Banawa ug Englis.

Ang Guadalupe may 84 ka sitio ug lisud kaayong dumalahon sa usa lang ka kapitan sa barangay. (BANAT NEWS)