40 pamilya sa Barrio Luz padayong nabalaka

CEBU, Philippines - Nabalaka na pag-ayo ang dul-an sa 40 ka mga pamilya sa tulo ka mga sitio Barrio Luz gumikan kay gitakda na karong Agosto 3 ang demolisyon sa ilang dapit.

Sumala pa sa pangulo sa Nasudnong Katawhang Kabos (Nakabos) nga si Evangeline Abejo nga ang mga maapektohan sa demolisyon naglangkob sa sitio Langka, sitio Mabuhay ug sitio Lubi.

“Luoy intawon kaayo ang uban, kay halos wala na’y tulog tungod sa kakulba nga madayon ang demolisyon,” matud pa ni Abejo.

Mapasalamaton hinuon si Abejo gumikan kay padayon karon nga mihimo og negosasyon ang Division for the Welfare of the Urban Poor (DWUP) aron dili madayon ang maong demolisyon.

Usa sa pamaagi nga giisa sa mga maapektohan sa demolisyon mao nga paliton sa siyudad ang ilang mga luna.

Ang mga apektadong molupyo mihangyo sa siyudad nga ipapalit ang luna nga ilang gipuy-an ug sa siyudad nalang sila mobayad.

Gipadayag ni Abejo nga ang maong mga luna gipanag-iya sa nasudnong kagamhanan ubos sa Community Mortage Program apan nasuta nga daghan kanila ang nadelatar sa pagbayad maong gimandoan na sila sa pagpapahawa.

Nadismaya si Abejo gumikan kay basta-basta lang nga pahawaon ang mga residente, gani luna kini nga gipanag-iya sa gobiyerno.

Kasagaran sa mga maapektohan sa demolisyon nagpuyo na sa maong dapit sukad pa niadtong 1958 busa dili sila makaako sa pagbiya sa ilang giistaran.

Matud pa ni Abejo nga naa na sa maong dapit ang tinubdan sa panginabuhian sa mga residente ug nagtungha usab ang kasagaran sa mga anak niini sa Barrio Luz Elementary School. (/EIM)(BANAT NEWS)