2 gipanunggab patay

CEBU, Philippines - Duha ka lalaki ang nadunggaban patay sa managlahi nga oras ug lugar sa lalawigan sa Sugbo sa miaging gabii.

Ang mga biktima mao sila si Rolito Punay, 36, nga taga Gov. MJ Cuenco, barangay Poblacion, lungsod sa Daanbantayan, ug si James Henieta, 19, ulitawo nga taga sitio Buhing Tubig, barangay Buanoy, lungsod sa Balamban.

Samtang ang mga suspetsado mao sila si Ranilo Punay, 28, nga maoy miunay og patay sa iyang maguwang nga si Rolito Punay, ug Marvin Cangke, 25, nga taga sitio Kamangggahan, Buanoy nga maoy mipatay kang Henieta.

Sumala sa record sa kapolisan, si Rolito gipatay sa iyang manghud nga si Ranilo human tuk-a niini ang ilang amahan.

Hubog kuno kaayong miabot ang biktima sa ilang balay ug dihang wala kini binli og panihapon, nanghagis kini.

Ang manghod nga natulog na, nakamata tungod sa kalangas sa biktima busa iya kining gibadlong apan sila na hinuon ang nagkaaway.

Busa misuway og badlong kanila ang ilang amahan, apan gipitlok kini sa biktima.

Ang suspetsado nga naupsan na sa pailob mikuha og kutsilyo nga maoy gihansak sa tiyan sa iyang maguwang ug maoy hinungdan sa hinanaling kamatayon sa biktima.

Samtang si Henieta giingong migukod sa suspetsado samtang nagpaingon na kining naulahi pauli sa ilang balay   ug maayo nalang kay nakatago siya (suspetsado).

Gumikan kay dili siya gusto nga maunhan sa pagpatay, mikuha siya og kutsilyo sa ilang balay ug dihang nakita niya ang biktima gihansakan niya ang dughan niini sa kutsilyo nga maoy hinungdan sa kamatayon niini.

Gisuwayan pa  og hatud ngadto sa Balamban District Hospital ang biktima sa iyang tagtungod apan gideklarar kini nga dead on arrival.

Ang mga suspetsado pulos na nabalhug sa prisohan ug nagpaabot sa tukmang kiha nga isang-at batok kanila. (/WC)(BANAT NEWS)