60-anyos misuway'g lugos sa dalagita mitirador sa polis

CEBU, Philippines - Naangol ang usa ka polis human kini tiradora sa   60-anyos nga lolo kinsa misuway paglugos sa 15-anyos nga dalagita didto sa usa sa mga   sitio, sa lungsod sa Dumanjug niadtong Sabado sa alas 9:20 sa buntag.

Ang biktima nga lugoson unta giila lang   sa ngalang Inday, nagtungha sa high school sa maong lungsod, samtang ang gitirador nga polis mao si PO2 Dionesio Tagupa.

Ang suspek   giila lang sa ngalang Joe, 60-anyos, usa ka mag-uuma nga nagpuyo sa maong lugar.

Si SPO1 Joselito Abella sa Dumanjug Police Station mibutyag sa Banat News nga ang biktima kauban sa iyang ig-agaw nga usa usab ka menor de edad gisugo sa ginikanan sa pagpanguha og kahoy nga igsusugnod.

Dihang didto na kini sa lugar nga duol sa balay sa suspetsado kalit lang miduol sa suspek ug sa way daghang pangutana gideretso og gakus dayung panghikap sa mga   pribadong bahin sa lawas sa dalagita uban ang pagpislit sa dughan niini nga maoy hinungdang nakasinggit sa kasakit ang biktima. Ang laing menor de edad nga ig-agaw sa biktima maoy mitukmod sa suspek apan igo lang kining nasarasay ug nakuptan pa gyud ang tiil sa biktima nga buot untang modagan sa maong higayon busa wala kini makahigayon sa pag-ikyas.

Giguyod sa suspek ang biktima paingon sa silong sa iyang balay apan gumikan sa kakusog sa siyagit sa biktima nakadungog ang duha ka igsoong lalaki niini. Ang masuk-anong mga igsoon sa biktima maoy nakapapugos sa suspetsado sa pagbuhi sa gigakus na niyang biktima.

Dayon misulod kini sa iyang balay ug nanirado sa pultahan.

Wala kini makagawas aron pag-ikyas dihang gilibotan na sa mga tanod ang iyang balay hangtod nga miabot ang kapolisan.

Apan tungod kay may tirador kini, gitarget sa suspek ang walang paa ni PO2 Tagupa hinungdan nga milabhag kini agi sa bato nga maoy bala sa tirador ug nakapaangol sa maong polis.

Hinuon wala siya makaikyas sa kapolisan nga misikop kaniya ug karon nagtingkagol na siya sa prisohan sa l.ungsod samtang nagpaabot sa tukmang kiha nga ipasaka batok kaniya. (BANAT NEWS)