Giligid og bunal sa sanga sa bayabas namatay

CEBU, Philippines - Namatay ang usa ka construction worker human kini ligira og bunal gamit ang sanga sa bayabas sa iyang silingan sa sitio Basbas, barangay Pagsabungan, dakbayan sa Mandaue sa miaging kaadlawon.

Ang biktima mao si Joly John Roble, 30, ulitawo, nga lumad nga taga Canlaon, Negros Oriental ug nagtrabaho sa usa ka gitukod nga edipisyo sa maong lugar.

Samtang ang suspetsado mao si George Ruiz, 62, minyo, ug silingan sa biktima.

Si PO2 Richard Ares sa kapolisan sa nahisgotang dakbayan miingon nga gikan pa nga nag-inom- og alak ang biktima ug nagsusapinday kini nga naglakaw pauli sa ilang balay.

Matud pa ni PO2 Ares nga samtang ang suspetsado kinsa nakainom ug hubog usab sa maong higayon misugat sa biktima ug sa walay igong hinungdan kalit lang kining giligid   og bunal sa sanga sa bayabas nga iyang dala.

Si Dionesio Sevilla nga silingan sa biktima ug suspetsado nga nakakita sa maong hitabo mitug-an sa kapolisan nga matud pa ang namatyan sa biktima mao ang pagkabun-og sa ulo niini agi sa sanga sa bayabas nga giingong susama kadako sa bukton sa batang 7 anyos.

Apan gawas sa ulo nasabak usab pag-ayo ang uban pang bahin sa lawas sa biktima nga naglakip sa iyang liog nga maoy nakapahagba niini sa yuta.

Si PO2 Ares miingon gidala dayon sa tagtungod ang biktima ngadto sa Mandaue City Hospital apan gideklarar kini sa mga doktor nga dead on arrival.

Dugang pa ni PO2 Ares nga ang suspetsado nga ilang nadakpan didto sa balay niini sa barangay Pulpogan mitug-an nga misulod sa ilang balay ang biktima maoy hinungdan nga iya kining gibunalan hangtud namatay. (BANAT NEWS)