Konseho gidayeg ni Rama

CEBU, Philippines - Wala panumbalinga ni Mayor Michael Rama ang init nga dagan sa politika sa Siyudad sa Sugbo ug iyang gidayeg ang konseho kagahapon gumikan sa proposal niini nga umentohan ang honorarium sa mga consultant sa Cebu City Medical Center (CCMC).

Nagkanayon si Rama nga usa kini ka maayo nga aksyon sanglit mapapas ang kabalaka sa katawhan kalabot sa laraw sa konseho nga ibaligya ang maong tambalanan ngadto sa pribadong kompanya.

Nanghinaut ang mayor nga magpadayon pa ang konseho sa paghuna-huna og mga maayong buhat nga motakdo sa iyang mga programa aron makita sa publiko nga adunay kooperasyon ang executive ug legislative department sa pag-atiman sa mga batakang serbisyo niini alang sa katawhan sa dakbayan sa Sugbo.

Matud pa ni Rama nga adunay mga higayon nga mokuha unta sila og dugang consultant apan maglisod sila pagkumbinser niini gumikan sa kagamay sa honorarium.

Nasayran nga ang mga consultant sa CCMC nagdawatan lang og P4,000 ngadto sa P6,000 matag buwan apan may nagdawat usab og P18,000 depende sa departamento nga ilang nahimutangan.

Sayo niini gipadayag ni Konsehal Rodrigo Abellanosa nga kinahanglan nga paumentohan ang mga consultant sa CCMC   kay wala ra ba kini magdawat og “professional fee’.

Kasamtangang may 36 ka consultant ang CCMC kinsa motabang sa pipila ka operasyon sa mga resident doctor sa maong tambalanan.

Padayon usab nga tun-an sa konseho ang mga panukdanan aron   labi pang motaas   ang honorarium sa mga consultant sa maong tambalanan. (BANAT NEWS)