Nagmaoy nga nakigsumbagay napusilan sa miulang nga polis

CEBU, Philippines - Nalandig sa tambalanan ang usa ka lalaking giingong nagmaoy tungod sa kahubog human napusilan sa usa ka bagitong police nga kasamtangang nag-Field Training Program (FTP) diha sa usa ka imnanan dalan Bonifacio sa barangay Parian ning dabayan pasado ala-una sa kaadlawon kagahapon.

Nalandig sa tambalanan si Romeo Cejas, 31, molupyo sa maong lugar tungod sa naangkong samad pinusilan sa paa human mapusili ni PO1 Hallid Carlo Omar nga nadestino sa Police Station 3 apan nagpuyo sa maong dapit.

Sa pasiunang imbestigasyon sa kapolisan sa Parian Police Station, si Cejas gikatahong hubog kaayo ug nagmaoy ug nakakita og away sa usa ka Kennel Rivera, 21.

Si Rivera nakaangkon og samad sa iyang ilong ug nawong tungod sa gihimong pagpangulata ni Cejas. Apan sa dihang miulang ang maong polis gisuwayan hinuon og ilog sa suspek ang pusil ni Omar sa hawak.

Tungod niini naglayog ang duha ug mipaka ang lanog nga buto sa kalibre .45 pistola ni Omar nga nakaigo usab sa paa sa suspek una pa nahunong ang komosyon.

Daling gidala si Cejas sa Cebu Doctors Hospital samtang si Omar mitahan sa iyang kaugalingon ngadto sa Homicide Section sa Cebu City Police Office alang sa dugang imbestigasyon. (BANAT NEWS)