CEBU, Philippines - Ang Philippine Atmospheric Geophysical and Astronomical Services Administration (PAGASA) mipahimangno sa mga nagpuyo duol sa dagat, sapa ug kabukiran nga kinahanglang magmabinantayon.
Si Ella Comahig sa PAGASA Mactan sa pakighinabi niini sa Banat News kagahapon nagkanayon nga niining sige og uwan ug pagkusog sa hanging habagat posible kining magmugna og pagbaha ug pagdahili sa yuta ug pagdagku sa bawod sa dagat.
Ang maong pagkusog sa hanging habagat usa kini sa resulta sa bagyong Gener. Ang mga gagmay’ng sakyanan sa dagat gitambagang dili una mosungasong.
Hinuon matud ni Comahig nga wala silay nasigpatang bagyo nga moigo sa Visayas. Ang Visayas makasinati lang kini og habo-habo o pat-ak-pat-ak nga uwan tungod kay ang bagyong Gener naa kini mahimutang sa 250 kilometer sa sidlakang bahin sa Virac, Catanduanes kagahapon sa alas 10:00 sa buntag.
Ang Gener duna kini gikusgon sa hangin nga 55 kph sa tunga-tunga niini ug nag-irog ngadto sa amihanan- amihanang kasadpan sulod sa 15 kph.
Karong adlawa (Domingo), si Gener gilaumang naa sa 310 km sa sidlakan- amihanang sidlakan sa Casiguran, Aurora. Sa Lunes sa buntag si Gener ang gipaabot nga naa sa 460 km sa amihanan- amihanang sidlakan sa Casiguran, Aurora ug hingpit kining mogawas sa Pilipinas karong Martes sa gabii. (BANAT NEWS)