Davide nakahilak sa kalipay

CEBU, Philippines - Nakahilak sa kalipay si Dr. Romulo Davide human niya hisayri nga napili siyang usa sa mga mananaog sa Ramon Magsaysay Award.

Kini human siya moabot dinhi sa Sugbo gikan sa Luzon nga nag-atiman sa iyang pagpanudlo sa mga mag-uuma bahin sa hustong paagi ug sistema sa pagpanguma.

Si Dr. Davide, igsoon ni kanhi Supreme Court Chief Justice Hilario Davide Jr. nga taga Colawin, Argao nahimong inila dinhi sa nasud isip “Father of Plant Nematology” kansang sistema sa panguma naghatag og doble nga ani sa mga mag-uuma nga iyang tinudloan. Ang mga mag-uuma sa Argao nga iyang tagi-lungsod maoy pipila sa mga Sugboanon nga nakapahimus sa iyang  gipanudlo bahin sa hustong paagi sa pagpanguma.

Maoy hinungdan nga nahimo siyang garbo sa mga Argaoanon, ingon man sa lalawigan sa Sugbo ug sa tibuok nasud gumikan sa nakab-ot niyang pasidungog.

Gawas kang Davide, may nakadawat usab sa maong award nga taga Bangladesh,Cambodia, India, Indonesia ug Taiwan ang makadawat sa gitawag nga Nobel Prize sa Asia.

Ang maong award gipahinungod sa ngalan sa ilado na kaayong Presidente sa Pilipinas nga si anhing Ramon Magsaysay kinsa namatay dihang nahagsa ang abyon nga iyang gisakyan sa Mt. Manungal, sa bukirang barangay sa dakbayan sa Sugbo niadtong 1957. (WC)  (BANAT NEWS)