CEBU, Philippines - Namatay ang 56 anyos nga gituohang hubog dihang nadasmagan kini sa usa ka pedicab sa iyang paglabang sa highway sa barangay Tapon sa lungsod sa Dalaguete, niadtong Huwebes sa gabii.
Ang biktima mao si Lino Magallanes Jr., 56, minyo ug nagpuyo sa maong lugar.
Samtang ang nakadasmag kaniya mao ang pedicab nga gimaneho ni Felimon Silabay, 33, nga taga barangay Corro, sa maong lungsod.
Si SPOI Veronico Centino sa Dalaguete Police Station mibutyag sa Banat News nga paingon na untang mopauli sa ilang balay ang biktima gikan sa Poblacion, Dalaguete dihang kalit kining milabang sa karsada nga walay pagpakabana nga duol na kaayo ang pedicab ni Silabay.
Gumikan sa kakalit ulahi na kaayo ang pagpreno sa suspetsado sa iyang sakyanan hinungdan nga nasabak ang biktima, nalabay, ug napantok ang ulo sa sementadong karsada nga maoy hinungdan sa iyang kamatayon.
Gisuwayan og hatud ngadto sa Vicente Sotto Memorial Medical Center (VSMMC) sa dakbayan sa Sugbo diin kini hikabsi sa kinabuhi.
Sa pagkakaron nagtingkagol na sa prisohan ang suspetsado samtang gipaabot ang tukmang kiha nga isang-at batok kaniya sa tagtungod sa biktima. (/WC) (BANAT NEWS)