Guardo sa BOPK

CEBU, Philippines - Gitahod sa Team Rama ang pakig-alyado sa negosyanteng si Jonathan Guardo ngadto sa Bando Osmeña Pundok Kauswagan (BOPK) nga gipangulohan ni Kongresista Tomas Osmeña.

Sumala pa sa chief of staff ni Mayor Michael Rama nga si Philip Zafra katungod ni Guardo ang pagpili kinsay suportahan. Si Guardo higpit kaniadtong karibal ug kritiko ni Osmeña sa politika ug nagkaatubang na usab sila sa nakalabay’ng piniliay diha sa South District diin si Guardo sakop sa Kugi Uswag Sugbo (Kusog) niadtong 2010 diin naparot si Guardo.

Wala hinuon mohatag og komento si Zafra kung makaapekto ba kini o dili sa makuhang botos ni Rama sa umaabot nga bugnong lugaynon klarong 2013.

“Ang ato lang karon, dili ta maghuna-huna o maayo anang butanga . Ang mayor magpadayon gihapon sa paghatag og mga proyekto ngadto sa katawhan,” sumala pa ni Zafra. Kahinumduman nga opisyal nga mideklarar si Guardo sa iyang pagsuporta sa BOPK atol sa birthday ni Osmeña nga giselebrar sa usa ka dakong mall sa dakbayan sa Sugbo niadtong Huwebes sa gabii.

Si Guardo mihatag og cake kang Osmeña nga dunay suwat nga “Type O Na Ta!” ang bag-ong slogan sa BOPK.

Nagsugod ang ilang panagbangi sa dihang si Guardo maoy nagsilbi nga tsirman sa sports commission sa dihang si Osmeña pa ang mayor. Si Guardo nag-atubang og kotrobersya niadtong higayona sa 23rd ASEAN Games. Suporta lang ang gihatag ni Guardo sa BOPK ug wala kini plano nga mopapili og posisyon sa piniliay sanglit ang igsuon niya nga kapitan sa Sambag1 nga si Jerry Guardo magpapili pagkakonsehal ubos sa Team Rama. (BANAT NEWS)