Plebisito pagbuak sa Guadalupe "ready to go na"

CEBU, Philippines - Andam na ang Commission on Elections (Comelec) sa pagpahigayon sa plebisito sa planong pagbuak sa barangay Guadalupe ugmang adlawa aron paghimong usa ka barangay sa sitio Banawa ug Englis.

Gibutyag ni Comelec election supervisor for the North district Atty. Edwin Cadungog dihang nahinabi sa Banat News buksan ang botasyon niadtong pabor o supak sa pagbuak sa barangay Guadalupe sa alas 7:00 sa buntag ug tapuson pagka alas 3:00 sa hapon.

Ang botasyon anha lang himuon sa Guadalupe Elementary School diin gipahibawo ni Cadungog nga kadto lang mga rehistradong botante ang mahimong makasalmot.

Sa mga transferee ug bag-ong nakaparehistrong botante ang makabotar kadto lang nakaparehistro hangtud sa petsa 31 sa milabay’ng bulan sa Abril. Matod ni Cadungog human sa pagtak-op sa botasyon pagka alas 3:00 sa hapon himuon dayun ang pag-ihap.

Gipasabot ni Cadungog nga kun ugaling modaug ang ‘yes’ pabor sa paghimong barangay sa sitio Banawa ug Englis wala pay eleksiyon nga mapahigayon karung tuiga tungod kay wala nay pundo ang Comelec.

Apan gipasabot sab ni Atty. Cadungog nga kun modaug ang supak pagbuak sa Guadalupe mamatay ang balaod nga nagtinguha pagbuak niini.

Kagabii sa tungang gabii pormal nga napupos ang campaign period nga gitugot sa Comelec ug kagahapong adlawa gilusad ang meeting de evance sa mga opisyal sa barangay Guadalupe ug mga molupyo nga pabor ug supak. (BANAT NEWS)