Taga Labangon modangop sa SC kun 'yes vote' modaug

CEBU, Philippines - Mibahad ang taga Labangon nga moreklamo sila sa Korte Suprema kun modaog ang “yes votes” sa plebisito sa Sabado, Hulyo 28, 2012

Si Kapitan Victor Buendia sa Labangon maoy usa sa mahimong speaker sa meeting de abanse karong gabii sa barangay Guadalupe nga mosupak sa pagbuak sa maong barangay.

Karong adlawa maoy katapusang adlaw sa pangampanya alang sa plebisito sa maong barangay karong Sabado. Usa sa mga rason nga mosupak si Buendia nga buakon   ang Guadalupe tungod sa tataw kaayong   matibhangan ang mga sitio sa Labangon.

Nasayran nga ang gipuy-an ni Buendia sa Rosalina Village sa Labangon maoy usa sa maapektohan kung modaug ang “Yes Vote” kay mahiadto naman kini sa Banawa-Englis. 

Samtang ang usa sa mga kagawad sa Labangon nga si Ronald Dagatan misaysay sa Banat News nga mokunhod ngadto sa P5 milyones ang kitaong buhis sa Labangon kung ang ubang area niini mahisakop sa maumol nga Barangay Banawa-Englis.

Gumikan niini   mibahad si Dagatan   nga kung modaug ang “Yes Vote” , modangop gyud sila og korte aron ilang hingusgan ang pagsupak sa pagbuak sa Guadalupe.

“Tanang mga pamaagi , amo gyud nang buhaton kay dili mi gusto nga makuhaan og mga sitio ang among barangay,” matud pa ni Dagatan. Samtang ang kapitan sa Guadalupe nga si Michael Gacasan mapasalamaton sa gihatag nga kooperasyon sa mga opisyales sa Labangon.   Dugang pa sa kapitan nga importante kaayo ang kooperasyon sa katawhan busa iyang gihangyo ang katawhan nga mobotar gyud karong Sabado. (BANAT NEWS)