Vidal ngadto sa pabor sa RH Bill: Magkita ta sa eleksyon
CEBU, Philippines - Wala direktang mihatag og negatibong reaksyon si Archbishop Emeritus Ricardo Cardinal Vidal kabahin sa padayong pag-endorsar ni Presidente Benigno Aquino III sa kontrobersyal nga Reproductive Health (RH) Bill.
Apan si Vidal mipasumbingay nga dili makapaabot og suporta ang mga politiko nga misuporta sa RH Bill gikan sa simbahang katoliko. Kung gipakpakan og maayo si Aquino sa Batasang Pambansa wala kini makapahimuot sa mga kadagkoan sa simbahan nga numero unong misupak nga mapasar ang balaudnon.
Si Vidal mibutyag nga nakighinabi na siya sa mga opisyal sa Catholic Bishop Conference of the Philippines (CBCP) nga gipaabot nga mopadala og suwat ngadto sa Malacañang Palace nga mopahibawo nga undangon na nila ang pakig-dialogue aron hisgutan pa ang RH Bill. Si Vidal mipasidaan nga makita ang aksyon nga himuon sa simbahan atol sa eleksyon.
“We shall see each other in election time, Bishops will try to assert the rights of the church and hopefully catholic lay faithful will follow.”
Miingon si Vidal nga mohimo sila og listahan sa mga lokal ug national candidates nga ilang suportahan sa eleksyon ug sila mao ang politikong supak sa RH Bill.
Atol sa State of the Nation Address (SONA) ni Aquino niadtong Martes, gihisgutan sa presidente ang pagpalig-on pa sa programa nga ‘responsible parenthood’ nga gisabot sa kadaghanan nga mao ang pagduso sa dugay nang gidebatehan nga RH Bill.
Ang maong bahin sa SONA ni Aquino miani og positibong reaksyon didto sa Kongreso human iyaha kining (responsible parenthood) gisumpay sa nasinating problema sa Department of Education sa kakulangon sa mga libro, lawak-saringan ug mga bangko sa tibuok nasud tungod sa pagdako sa populasyon.
Dili na hinuon kini angayan pang ikatingala kang Aquino sanglit niadto pang campaign period (2010) nag-ungot na ang maong isyu ug gidebatihan na og maayo ug ang baruganan ni Aquino ‘responsible parenthood’ ra gihapon. (BANAT NEWS)
- Latest
- Trending
