Ahente gipadakop sa Globe Telecom

CEBU, Philippines - Usa ka third party agent sa Globe Telecom ang gidakop pinaagi sa entrapment operation sa kapolisan sa Talisay tungod sa reklamong nagpalusot kini og internet modem nga iya sa kompanya.

Ang gidakop mao si Jonathan Hortesano, 34, taga barangay Yati, lungsod sa Liloan gikatakda kagahapon nga pasakaan og kasong estafa diha sa piskaliya sa siyudad.

Matud pa ni SPO4 Daniel Tarucan mireklamo ang Globe Telecom batok kang Hortesano tungod sa pagpamaligya niini og Wimax Globe broadband modem alang sa wireless internet connection.

Ang maong broadband nagkantidad og P8,000 ug giingong si Hortesano ang mokolekta sa bayad.

Si Hortesano isip third party agent trabaho niini ang pagpangita og kliyente ug mohikay sa mga dokumento sa magpataod og internet connection apan dili kini maoy motaod niini.

Matud pa nga pasaligan sa suspetsado ang mga kliyente nga dili na sila magbayad pa og binuwan basta ang bayad adto sa iyaha ipaagi.

Ang mga nailad ni Hortesano nga naputlan sa ilang internet connections miadto sa buhatan sa Globe diin nila madiskubreheng illegal diay ang koneksyon nga gitaod kanila.

Si Jojo Biray, security operation sa Visayas area sa Globe Telecom mi-report sa kapolisan niadtong Lunes sa hapon ug nangayo og panabang alang sa entrapment operation batok kang Hortesano.

Sila si Inspector Hugo Rio Ipong uban nila ni PO3 Benedicto Lasque, PO3 Ferdinand Pablo, PO2 Oliver Ortega, PO2 Euwen Pitogo ug PO1 Rechel Origenes ang nagpahigayon sa entrapment operation.

Si Origenes maoy poseur buyer sa maong entrapment operation ug nakig-negotiate kang Hortesano. Ang maong transaksiyon natigayon diha sa usa ka mall sa Talisay diin ang suspetsado nasikop.

Na- recover gikan ni Hortesano ang Wimax modem ug antenna niini ug ang marked money nga P4,500 (upat ka tag P1,000 ug usa ka P500).

Si Hortesano nga nahinabi sa mga tigbalita kagahapon nagkanayon nga sa milabay’ng tuig pa siya nga ahente sa Globe ug ang nahitabo niadtong Lunes maoy una niyang transaksiyon tungod kay giingong si Origenes nag-apura kining magpataod og internet connection ug buot na niining kuhaon dayon ang modem.

Apan si Gerald Bechayda, security officer sa Globe miingon nga dili empleyado sa Globe si Hortesano kay trabahante kini sa ilang sub-contractor isip third party agent.

Matud usab niya nga ang mga modem gitugyan nila ngadto sa ilang mga contractor ug dunay mga insidente nga inig-imbentaryo nila dunay mga modem nga nangawagtang.

Matud usab niya nga ang mga ilegal nga linya maoy makahinay sa connection sa internet sa Globe, giawhag sa Globe ang publiko nga ipahibalo kanila kung dunay ahenteng mohaylong matauran sila og internet connection apan kadudahan ang transaksyon. (BANAT NEWS)