CEBU, Philippines - Duha ka balay ang nasunog didto sa Barangay Basak dakbayan sa Lapulapu, duol sa Indiana Aerospace University kagahapon sa ala 1:24 sa hapon.
Ang maong mga balay gipanag-iya ni Ruben Patalinjug ug Dexter Pobor ingon man ang mga plastik sa usa ka scrap yard nga gipanag-iya ni Alfredo Dizon.
Base sa pasiunang imbestigasyon nga gihimo ni SFO2 Atilano Berido sa Lapulapu Fire Station nasuta nga kasagaran sa nasunog mga plastic ug wala pa hisayri kun tungod ba kaha sa kainit sa panahon o kaha nalabayan og upos sa sigarilyo ang maong lugar nga maoy misilab sa duha ka balay nga pulos gaan og materyales nga maoy hinungdan sa dali nga pagkaugdaw niini.
Hinuon walay gikatahong naangol sa maong hitabo ug padayon pang gisuta sa mga kabomberohan ang tinuod nga hinungdan sa maong sunog ingon man ang katibuk-ang kantidad sa danyos niini. (BANAT NEWS)