2 lalaki nakuhaa'g mga armas

CEBU, Philippines - Duha ka kadudahang lalaki ang gidakop sa mga sakop sa Special Weapons and Tactics sa Lapulapu City Police Office human mabantaying gitaptapan niini ang plaka sa iyang motorsiklo atol sa pag-agi niini diha sa sitio Suba Masulog sa barangay Subabasbas kagahapon sa kaadlawon.

Ang mga nasikop mao si Delmar Lawas, 29, residente sa Mar Beach Marigondon dakbayan sa Lapulapu ug Alvin Billones, 27, mga residente sa Canjulao dakbayan sa Lapulapu.

Sumala pa nga nasigpatan sa nagpatrolyang mga sakop sa SWAT ang mga suspek nga sakay sa usa ka motorsiklo nga wala magsuot og helmet ug namatikdang gitaptapan ang plate number niini.

Tungod niini gisitar sila ni PO2 Rolan Mellor ug PO2 Jose dela Peña Caratao ug mga kaubanan sa SWAT team ug ilang nabantayan nga dunay mga armas si Billones hinungdan nga sila gidakop.

Nakuha gikan kang Billones ang duha ka .9mm pistol nga adunay sulod nga 10 ka buhing bala. Ang duha wala makapresentar og legal nga papeles sa pagdala sa maong mga armas ug wala usab makatubag dihang gisukitsukit nganong gitabunan nila ang plaka sa ilang motorsiklo.

Giimbestigar karon sa kapolisan ang duha tungod sa pagdudang posibleng duna silay dautan untang buhaton diha sa maong dakbayan apan nasanta lang.

Sa pagkakaron kasong paghupot og armas ug kalapasan sa lagda sa trapiko ang atubangon sa duha. (BANAT NEWS)