4 rob suspects sa Cebu North nag-operate usab sa Metro Cebu

CEBU, Philippines - Ang upat ka giingong notadong tulisan ang nadakpan sa kapulisan sa managlahing operasyon sa Danao City police ug Consolacion police niadtong Biyernes sa gabii gikatahong nalambigit usab sa ubang krimen sa Sugbu.

Kini maoy gibutyag ni Chief Insp. Wilbert Parilla, hepe sa Consolacion police sanglit mga miyembro og robbery group nga naglihok dili lang sa habagatang bahin sa Sugbo apan moabot usab sila sa siyudad sa Sugbo.

Kasong robbery ug illegal nga paghupot og armas ang gipasaka na sa korte kagahapon batok kang Roger Doncillo, 36 ug sa igsuon niini nga si Ryan Doncillo, 22, taga Barangay Talamban, Cebu City; ug kang Jose Batican, 34, nga taga Barangay Ilaya, Danao City.

Ang tulo nga unang nadakpan nakuhaan og .45 caliber nga pistola nga adunay upat ka buhing bala, usa ka .38 revolver nga adunay tulo ka bala ug usa ka .357 revolver nga anaay tulo ka bala. Ang mga na-recover nga ebidensiya anaa na sa PNP Crime Laboratory-7 alang sa ballistic examination.

Lahing kaso nga robbery ang napasaka na usab sa korte batok kang Ruben Doncillo, 18, nga nadakpan sa Danao City police sa follow up operation.

Ang upat nagsakay sa duha ka managlahing motor padulong sa Cebu City dihang nadakpan sa checkpoint sa Barangay Casili, Consolacion. Si Ruben giingong sakay sa Yamaha nga motorsiklo nga adunay plate number 8649OS uban ni Batican samtang si Roger ug Ryan sakay usab sa usa ka Rusi nga motorsiklo. Siya midugang nga si Roger naaresto sa Danao human makapatay niadtong Martes sa miaging semana apan wala mapasakai og kaso human wala na mipakita ang complainant.

Sa lahing interbyu, ang mga suspetsado kusganong mihimakak sa mga pasangil batok nila. (BANAT NEWS)