Sa GMA Administration: "We can't forgive and forget" - P.Noy
CEBU, Philippines - Giklaro ni Presidente Benigno Aquino III kagahapon sa iyang State of the Nation Address atubangan sa Batasang Pambansa nga ang paggukod sa mga tawong nakasala usa ka makatarunganong lakang alang sa kaayuhan sa tanan.
Sumala pa ni Aquino kinahanglang manubag ang dunay sala ug mahatag ang katarungan alang sa mga nabiktima, ang mga gipasabot ni Aquino mao ang mga nakita niyang kahiwiang nahitabo sa kanhi pamunoan ni kanhi pangulong Gloria Macapagal Arroyo sulod sa siyam niini ka tuig nga pagkapangulo.
“Ang magpatawad ay maari, ang makalimot ay hindi,” matud pa niini dugang sa paghisgot sa mga 53 ka mga nabiktima sa masaker sa Maguindanao nga gipasangil ngadto sa usa ka dakong pamilyang kaalyado ni Arroyo. Mga sundalo ug polis nga nakalas tungod sa kakulangon sa mga gamit samtang naghimo sa ilang mga trabaho pagpanalipod sa publiko ug kahapsay ug kalinaw tungod gihapon sa kurapsyon nga ang pundo adto napunta sa mga kurakot nga opisyal.
Gihimo usab niyang sanglitanan ang plunder case nga gipasaka batok kang Arroyo niadtong nakalabay’ng semana.
“Katarungan ang tawag sa plunder case na isinampa laban kay Gloria Macapagal Arroyo, at matatawag din na katarungan ang maipagtanggol niya ang kanyang sarili (sa korte),” matud pa ni Aquino sa nationwide coverage sa iyang SONA kagahapon.
“Kung inosente ka, buong loob kang haharap sa korte,” dugang pa niini nga gisumpayan sa pag-ingon nga kung sad-an ang si bisan kinsa kinahanglang atubangon ug dawaton nila ang ilang silot. Lakip sa gipalabtikan ni Aquino mao ang nahimong resulta sa impeachment trial batok ni kanhi Chief Justice Renato Corona kinsa natangtang sa pwesto.
Si Corona gipasanginlang batabata ni Arroyo. Aron usab mapakgang ang kurapsyon giawhag ni Aquino ang Kongreso sa pag-amendar sa Anti-Money Laundering Law sa nasud aron mas mahadlok ang mga hiwing opisyal nga mangawkaw sa panudlanan sa gobiyerno.
Matud pa ni Aquino ang lig-ong balaod kontra kurapsyon magsigurong dili mausik ang mga repormang gipatuman sa iyang administrasyon nga nakatabang og dako sa kinabag-ang Filipino. (BANATNEWS)
- Latest
- Trending
