Konseho gipaninglan sa mga kabus

CEBU, Philippines - Naningil na ang grupo nga Nasudnong Katawhang Kabus (Nakabus) sa konseho sa dakbayan sa Sugbo kalabot sa gigahin nga P27 milyones    alang sa socialized housing project (SHP).

Si Evangeline Abejo, pangulo sa Nakabus nagkanayon nga nahibulong sila kay niadtong Hunyo miduso og resolusyon ang Local Housing Board alang sa maong katuyoan apan hangtud karon,wala man kini aprobahi.

Dugang pa niya nga importante kaayo ang maong budget sanglit gamiton kini sa pagpamalit og mga yuta   nga tarokan og mga balay ilabi na niadtong naapektohan sa mga clearing operation sa city hall.

Nagkanayon si Abejo nga dili unta kini angayang langay-langayon sanglit kuwarta man kini sa katawhan.

Apan si Konsehal Alvin Dizon nga nahinabi sa Banat News kagahapon miingon nga iya una nga susihon kung nakadawat ba sila og proposal.

Matud pa sa konsehal nga wala siya makahinumdom nga adunay giduso nga resolusyon ang local housing board kalabot ning maong isyu

Dugang pa ni Dizon nga kanunay gyud niya nga gihatagan og pagtagad kung hisgutan na ang mga isyu kalabot sa socialized housing project sanglit siya man ang tsirman sa committee on housing.

Gani nadismaya si Dizon sa Division for the Welfare of Urban Poor (DWUP) gumikan kay wala pa gyud gamita niini ang P25 milyones nga annual budget alang sa pag-develop sa mga relocation site alang sa mga molupyo nga maapektohan sa mga demolisyon.    (BANATNEWS)