13-anyos gikulata gidunggab sa uyoan

CEBU, Philippines - Usa ka uyuan ang gisikop sa kapolisan sa dakbayan sa Mandaue human niini kulataha ug gidunggab ang iyang 13-anyos nga pag-umangkon tungod sa pagdudang kini maoy milungkab sa iyang internet café diha sa sitio Tribunal, barangay Centro niadtong Biyernes sa gabii.

Ang suspek nga si Neil Heyrosa 42, gisikop sa mga sakop sa Investigative and Detective Management Bureau (IDMB) pinangulohan ni P/Insp. Ramil Morpos human gipahigayon ang hot pursuit operation alang kaniya tungod sa reklamo sa bata ug sa inahan niini.

Ang inahan sa bata nga igsuon sa suspek misumbong nga kalit gikulata sa naulahi ang iyang anak ug gipasanginlang nangawat ang bata sa iyang internetan.

Ang uyoan giingong mipunit og kutsilyo ug gidunggab ang bata hinungdan sa pagkaigo sa walang kamot niini dayong ikyas, ang bata gidala sa Mandaue City Hospital ug pagkahuman misumbong sa kapolisan.  

Si Heyrosa nasikop samtang nakig-inom sa mga silingan. (BANAT NEWS)