Babaye giluba angol sa kauban niyang babaye

CEBU, Philippines - Nabuslot ang tiyan sa usa ka babaye nga giunay og dunggab sa babayeng kauban niya sa trabaho sa barangay Maribago, dakbayan sa Lapulapu sa miaging gabii.

Ang biktima mao si Rechell Abing, 21, dalaga ug nagtrabaho isip usa ka physical therapist sa usa ka establisamento sa Lapulapu ug nagpuyo sa maong dapit ug   ang suspetsado mao usab si Gretchene Dugamo, 22, nga taga barangay Poblacion, lungsod sa Cordova.

Si PO2 Ernie Luisito sa homicide section sa kapolisan sa maong dakbayan nga nahinabi sa Banat News miingon nga daan nang nagkabangi ang duha ug sa miaging gabii nagkatagbo sila ug gumikan sa pagdumot, gipaligas lang sa suspek ang biktima dayon gihansakan ang tiyan niini   sa iyang kutsilyo.

 Gidali paghatud sa mga kabanay ang biktima ngadto sa Mactan Doctor’s Hospital.

Samtang ang suspetsado mitahan usab dayon ngadto sa kapolisan sa dakbayan ug nagkagulkol na karon sa prisohan.

Matud pa ni PO2 Luisito nga giandam na nila ang kaso   nga ipasaka batok sa maong suspetsado. (/WC)(BANAT NEWS)