CEBU, Philippines - Talandugon ang kahimtang sa usa ka lalaking abogaduhon o barrister human kini gikatahong nagpusil sa iyang ulo human sa ilang panaglalis sa kapuyo alas-12 sa kaadlawon kagahapon diha sa sitio Maracas barangay Lahug dakbayan sa Sugbo.
Ang giingong nagpusil sa ulo giila nga si Henry Desuya, 49, usa ka market researcher ug molupyo ra usab sa maong lugar ug nakaangkon kini og samad pinusilan sa ulo.
Sa pasiunang imbestigasyon sa kapolisan nasayran gikan sa alegasyon sa kapuyo niini nga si Clemencia Esclamado nga nauli kining nakainom ug nagpunay kini og siyagit ug nanghagis dihang gipugngan.
Sumala pa nga mipabuhagay kini sa iyang mga problema gikan sa balatian ug pamilya apan imbes mokalma misamot kini og kasuko ug gipanglabay ang ilang mga butang hinungdan nga misampot kini sa panaglalis sa duha.
Lakip sa giingong gikahiubsan niini mao ang nabasahan niini sa text sa cellphone sa kapuyo niini apan wala hinuon ibutyag kun unsa kini.
Matud pa sa kapolisan dangtan pipila ka minutos mikuha kini og kalibre .38 rebolber ug diretsong mipabuto sa armas ngadto sa iyang ulo.
Daling gitabang si Desuya ug gidala sa Cebu Doctors Hospital tungod kay miungot ang bala diha sa ulo niini.
Ang Homicide Section sa Cebu City Police Office padayon pang nag-imbestigar sa maong hitabo lakip na ang pagpa-paraffin test sa duha aron matino kung kinsa ang nakapabuto og armas. (BANAT NEWS)