CEBU, Philippines - Kinawatay sa mga traffic signage usa sa mga problema sa traffic engineering sa dakbayan sa Talisay matud sa hepe sa nahisgutang buhatan nga si Almond Keith Dela Peña.
Si Dela Peña nga nahinabi sa Banat News mibutyag nga matag-buwan silang mag-ilis og mga signages diha sa kadalanan sa siyudad tungod kay pangawaton kini lakip na ang tubo nga poste ug steel plates niini nga mahimong ipatimbang.
Gibutyag ni Dela Peña nga nagsugod na sila og pagpaayo sa mga signages ning tuiga diha sa barangay Bulacao paingon sa Tabunok ug isunod dayon ang ubang dapit.
Kadtong mga karaang signages tangtangon ug ilisan og bag-o samtang ang mga gitangtang ayuhon aron magamit sa pagkasunod tuig.
Gibutyag ni Dela Peña nga duna nay nasikop diha sa barangay Bulacao tungod kay gikawat niini ang signage apan gipasaylo human niya ilisi ang iyang kinawat.
Si Dela Peña nanawagan sa mga barangay nga dunay signages nga gibutang nga tabangan sila sa pagbantay sa maong mga gamit.
Sa laing bahin, diha sa Cebu South Coastal Road dili lang signage ang kawaton lakip na ang mga wire sa kuryente sa poste hinungdan nga usahay dili na mosiga ang suga sa poste ug peligro kini sa mga motorista.
Sa milabay’ng mga tuig duna nay mga nasikop nga kawatan og mga wire diha sa CSCR. (BANAT NEWS)