SRP sirad-an alang sa international triathlon

CEBU, Philippines - Temporaryong sirad-an gikan sa mga motorista ang Cebu South Coastal Road diha sa South Road Properties (SRP) tungod sa ipahigayong International Triathlon nga pasiugdahan sa kagamhanan sa probinsiya karong Agosto 5, 2012.

Ang maong triathlon salmotan kini sa dili moubos 2,000 ka mga atletang Pilipino ug mga langyaw.

Sa nahisgutang adlaw ang maong karsada siradohon kini gikan sa alas 5:00 sa buntag hangtud sa alas 12:00 sa udto diin sa maong mga oras walay makasubay ug makalabang sa nahisgutang karsada.

Sa dakbayan sa Talisay, ang mga motorista dili makalabang diha sa eskina San Roque-Laray, eskina sa dalan Rabaya, eskina sa Pulong Deiparine, eskina Prisco Deiparine ug eskina Mohon-Pooc.

Si Almond Keith Dela Peña sa city traffic engineering mibutyag sa Banat News nga gilauman sa maong mga adlaw maghuot ang trapiko diha sa national highway nga lahos sa Natalio Bacalso Avenue sa habig na sa Cebu City sa pagsira unya sa CSCR.

Si Dela Peña nanawagan sa publiko nga mopailob lang una tungod kay tunga man lang sa adlaw ang maong kalihukan ug adlaw usab kining Domingo diin dili kaayo huot ang bul-og sa trapiko.

Matud usab niya ang CSCR habig sa Lawaan, dakbayan sa Talisay paingon nga boundary sa dakbayan sa Sugbo sirad-an ug sa dakbayan sa Sugbo paingon ngadto sa dakbayan sa Mandaue.

Ang triathlon tulo kini ka duwa diin dunay molangoy, magbisekleta ug modagan. Ang langoy anha ipahigayon sa kadagatan sa Marigondon, dakbayan sa Lapu-Lapu ug ang bisekleta molahos kini ngadto sa dakbayan sa Mandaue ug Talisay dayon balik na usab sa Lapu-Lapu. Samtang ang dagan anha lang kini ipahigayon sa Lapu-Lapu.

Ang mga sakyanan nga gikan sa habagatan nga mopaingon sa Sugbo gipahimangnoan nianang adlawa nga anha una moagi sa national highway.

Samtang ang mga sakyanan nga gikan diha sa sudlonong bahin sa dakbayan sa Talisay sama sa barangay Poblacion paingon ngadto sa barangay Tabunok anha paagion sa dalan Rizal dayon ngadto sa dalan Fidel Bas likod diha sa city hall building sa barangay Mohon paubos ngadto sa dalan sa barangay Linao sa eskina N. Bacalso dayon liko sa wala paingon na ngadto sa Tabunok.

Ang mga mopaingon ngadto sa dakbayan sa Sugbo ang nahisgutang karsada gihapon ang ilang subayon.  (BANAT NEWS)