'Balili case' Garcia ug mga kauban mipiyansa

CEBU, Philippines - Bisan pa man makakita og igong basehan ang Sandiganbayan sa pagluwat unya sa warrant of arrest batok kang Cebu Governor Gwendolyn Garcia di kini makakugang pa sa gobernador.

Kini human si Garcia boluntaryong misumitir sa iyang kaugalingon ngadto sa korte inubanan sa iyang abogadong anak nga si Kristina Garcia-Frasco kagahapon sa ala 1:00 sa hapon aron mopiyansa.

Human mopiyansa og P90,000 sa tulo ka kaso nga anti-graft ug technical malversation gihatagan ni First Executive Judge Soliver Peras sa Regional Trial Court Branch 10 og release order si Garcia.

Si Frasco nagkanayon nga sa pagkakaron wala pa silay plano pero sa higayon nga makadawat na sila sa resolusyon sa kaso una pa sila mohimo’g lakang. Matud pa niya ang kaso dili makaapektar sa pagdagan unya sa iyang inahan pagka senador kay ang rason sa pagdagan sa iyang inahan tungod kay ganahan siya moserbisyo sa katawhan.

Gawas kang Garcia si Provincial Engineer Eulogio Pelayre, Chairman of the Cebu Provincial Appraisal Committee and Provincial Assessor kaniadto Attorney Anthony Sususco, Provincial Treasurer Roy Salubre, Provincial Budget Officer Emme Gingoyon boluntaryo usab pagsumitir sa ilang kaugalingon sa korte ug mipiyansa. Kagahapon sa hapon gisang-at ni Ombudsman Conchita Carpio ang kaso batok kang Garcia ug uban pa ngadto sa Sandiganbayan.

Si Carpio nakakita og igong basehan sa nagkadaiyang complaints gipasaka nila ni Manuel Manuel, Crisologo Saavedra ug ang Public Assistance and Corruption Prevention Office of the Ombudsman-Visayas sa gihulagway nilang kwestyonableng pagpalit sa Kapitolyo sa Balili property sa Naga City.

Samtang gi-dismiss hinuon ang mga kaso batok ni Vice Governor Gregorio Sanchez, Jr. tungod kay patay na kini; samtang na-acquit sila si Mariflor Vero, Pilar Yburan, Michelle Languido, Roger Dumayac, Victor Maambong, Julian Daan, Agnes Magpale, Jose Maria Gastardo, Wilfredo Caminero, Peter John Calderon, Joven Mondigo, Jr., Teresita Celes, Rosemarie Durano, Wenceslao Gakit, Alfred Francis Ouano ug Bea Mercedes Calderon tungod kay way igong basehan sa ebidensya nga gipresentar sa prosekusyon batok kanila.

Ang ubang nakasuhan kauban nila Garcia sila si Provincial Board Member Juan Bolo ug ang tag-iya sa yuta sila si Amparo ug Romeo Balili. (BANAT NEWS)