Balayrunon sa 'Sticker' gipahunong

CEBU, Philippines - Giputol una sa Department of Trade and Industry-7 ang ilang gipangayo nga processing fees ug sticker fees kalabot sa gipatumang helmet law nga pagasugdan sunod bulan. 

Si DTI-7 Regional director Asteria Caberte mibutyag nga nakadawat sila og kamandoan gikan sa kaulohan nga nagmando nga hunongon una ang pagpanawat og bayad sa processing fee nga ilang gisugdan.

Lakip sa gimando mao ang pagpa-refund sa mga nakabayad sa maong stickers ug processing fees.

“Based on the DTI Consumer Welfare and Business Regulatory Group (CWBRG)-Regional Operations Development Group (RODG) joint memorandum, the DTI regional offices are given the authority to refund fees collected since it started implementing Clause 5.4 of the Department of Transportation and Communication (DOTC)-Department of Trade and Industry (DTI) Joint Administrative order 1:2011,” tipik sa gipadalang press statement sa DTI.

Matud pa ni Caberte nga ang onse mil na ka tawo ang milukat og stickers ug mibayad sa processing fees ila kining uli-an sa ilang gibayad kinahanglan lang nga moadto sila sa ilang buhatan pag-usab ug ipakita ang ilang mga resibo.

Bisan pa sa pagpahunong sa pagpabayad og stickers nga dunay ICC mark, magpadayon gihapon ang DTI sa pagdawat og mga buot magpapilit niini.

Butyag pa ni Caberte nga karung Lunes hingpit na nilang hunongon ang pagpangayo og processing fee ug sticker fee hangtud sa Septiyembre 30 ning tuiga.

Apan giklaro ni Caberte nga wala pa siya masayod kun lugwayan ba o hunongon na gyud ang pagpabayad nila sa mga stickers ug processing fees ug kun nganong kutob ra sa bulan sa Septiyembre 30.

Samtang wala na mokomento pa si Caberte dihang gipangutana sa mga tigbalita kung ang maong kamandoan may kalambigitan ba sa daghang mga reklamo sa mga motorista nga nagkuha og stickers sa ilang buhatan.

 Kahinumduman nga walay bisan usa ka motorista nga migawas sa mga balita nga nakadayeg sa sistema ug prosesong ilang giagian diha sa maong buhatan aron unta matuman ang gilatid sa ipatumang RA 10054 o ang Motorcycle Safety Helmet Act of 2009 karong Agosto 1.

Gawas pa niini dunay mga mikwestyon nganong pabayran pa sa DTI ang processing og P100 ug P1.25 sa matag sticker nga ipilit sa mga helmet nga mainspeksyon.

Usa na niini mao si Mayor Michael Rama kinsa mikwestyon sa maong balayrunon nga unta tungod kay ang mga mapalit karong helmet pulos na man ‘standard’ tungod sa paghigpit sa mga tindahan nga namaligya niini ug gani mahal na kini kaayo alang sa mga ordinaryong nanag-iya og mga motor. Ang maong balaod nga dunay multang P1,500 sa unang kalapasan ug magkabug-at sa sunod pang kalapasan. Tumong niini nga masiguro ang kaluwasan sa mga magmaneho og motorsiklo ug sa mga angkas niini. (BANAT NEWS)