Sa kasaysayan karon

Ultrasound diagnosis

CEBU, Philippines - 1955—Nasayod ba ka nga ang unang ultrasound nga importante kaayo karong gamit sulod sa tambalanan ilabi na sa pagpangita sa mga tumor gibase sa metal detector? Si Ian Donald, usa ka kanhi sonarman sa Royal British Navy niadtong World War II nga nagtrabaho sa usa ka tambalanan sa Scotland niadtong 1955 nakahunahuna pag-imbestigar sa laing gamit sa industrial ultrasonic metal flaw detector aron makita ang ilawom sa lawas sa tawong dunay balatian. Sama sa metal detector mobanda og balik ang ultrasound apan susama na og hulagway sa ilawom sa lawas. Tungod sa iyang imbensyon na-diagnose ug naoperahan ang labing unang pasyenteng gigamitan niini. Nasuta nga duna siyay ovarian cyst nga unang na-diagnose sa mga doktor nga kanser sa tiyan.

Unang jet nga gipalupad gikan sa barko

1946—Ang Estados Unidos maoy unang nasud nga mieksperimento pagpalupad og eroplanong migamit og jet engine gikan sa usa ka barko (aircraft carrier). Ang XFD-1 Phantom nga gi-piloto ni Lieutenant Commander James Davidson malampusong nakapalupad ug nakapatugpa sa maong abyon diha sa flight deck sa USS Franklin D. Roosevelt nga usa pa ka tuig nga nag-operate ug maoy labing dakong barko sa maong panahon sa tibuok kalibutan.

France napildi sa Indo-China War

1954—Natapos ang Indo-China war sa pag-surrender sa France sa giokupar nga North Vietnam ngadto sa mga komunistang Vietnamese pinaagi sa usa ka sabot-kalinaw didto sa Geneva, Switzerland. Ang mga lider sa communist North Vietnam Forces ug France nagkasabot nga tungaon ang Vietnam diha sa 17th parallel hinungdan sa katukoran sa North Vietnam ug South Vietnam. Nianang 1960 gisugdan og atake sa North Vietnam ang South Vietnam hinungdan nga miapil ang Estados Unidos sa gitawag nga Vietnam War. Sama sa gidangatan sa France, napildi ang US ug nasakop sa North Vietnam ang South Vietnam ug opisyal kining natapos niadtong 1975. (BANAT NEWS)