EV-71 virus kompirmadong nakasulod sa PHL

CEBU, Philippines - Gikompirmar sa Department of Health nga ang virus nga mitakboy sa usa ka tuig ug tunga nga batang lalaki susama sa virus nga mikalas og gatosang kabataan sa pipila ka nasud sa Asya, apan kini nakasugakod ug padulong na og kaayo.

Si Health Secretary Enrique Ona nagkanayon nga ang bata mao ray nakumpirmar sa walo ka kasong gidudahang natakboyan sa maong virus nga dunay gipakitang sintomas sa hand, foot and mouth disease nga gitawag og enterovirus 71 strain, o EV-71.

Matud pa ni Ona kagahapon (Biyernes) nga ang bata adunay mga rashes sa baba, mga kamot, tiil, dapidapi nga sagad makita sa matakbuyan sa maong virus.

Wala usab niya irekomendar nga ipasulod sa tambalanan ang maong bata sanglit nagkaanam na og balik ang kapiskay sa lawas niini ug wala say ubang miyembro sa ilang pamilya ug mga silingan ang natakbuyan niini.

Sa labing uwahing talaan gibanabanang 60 ka mga bata sa Cambodia ang unang natakbuyan niini ug mikalas og kapin 100 ka bata, lakip ang Vietnam ug China adunay susamang outbreaks nga natala sa maong sakit. (BANAT NEWS)