Teknolohiya ug kuwarta sa DOST alang sa SME

CEBU, Philippines - Ang Department of Science and Technology (DOST) mitunol sa iyang tabang dili lamang sa mga dagkong negosyante kundi bisan sa gagmay nga magpapatigayon nga gitawag nga small medium entrepreneurs (SME).

Mao kini ang gibutyag ni Engr. Rene Burt N. Llanto, Regional Director   sa DOST kinsa nagkanayon nga sa tibuok rehiyon mikapin na sa 1,000 ka mga SME ang natunolan nila og hinabamg.

Sa maong gidaghanon may pipila man nga gidimalas sa negosyo gumikan kay wala maayong pagkadumala apan kasagaran mapasigarbuhon kaayo ug mapasalamaton sa abag nga gitunol kanila sa DOST, sumala pa ni Llanto.

Kini tungod kay matud pa niya, ang suporta sa DOST dili lamang sa teknolohiya kundi bisan ang gikinahanglang puhonan sa negosyante.

Matud ni Llanto nga ang gihimo sa DOST mao ang pagsusi sa ginagmay’ng negosyo apan may potential nga modako aron suportahan nila sa dugang teknolohiya.

Pipila sa itudlo nilang teknolohiya mao ang mga paagi sa pagpatahom sa mga produkto sa usa ka negosyo gikan sa pagpaanindot sa kalidad niini hangtod sa iyang putos o labeling ug uban pang aspeto aron mahimo kining ikabaligya sa gawas .

Bahin sa suportang salapi, ang DOST makapahuwam sa negosyoante og gikan sa P1 milyon ngadto sa P10 milyones nga puhonan , agad lamang sa gidak-on sa negosyo nga ipaila sa usa ka negosyante.

Matud pa ni Director Llanto nga kasagaran sa mga negosyo nga ilang nahatagan og puhonan anaa sa natad sa pagkaon.

`Hinuon nagkanayon si Llanto nga   nakasugat usab sila og pipila ka problemado nga negosyante kansang negosyo nag-aginod busa naglisud usab sila sa pagbayad sa ilang nahuwam ngadto sa DOST.

Miingon si Llanto nga gipakita lang sa maong ahensya nga dili lamang kini alang sa mga adunahang negosyante kundi gihatagan niini karon og dakong pagtagad ang gagmay nga magpapatigayon aron makabangon sila og mouswag sa panginabuhi duyog sa kampanya sa kasamtangang administrasyon ang pagpakunhod sa kakabus sa nasud nga Pilipinhon. (BANAT NEWS)