Call center agent hayan mokiha vs CIDG

CEBU, Philippines - Dunay plano ang mga empleyado sa 72/4 Care Call Center sa pagpasaka og reklamo batok sa mga sakop sa Criminal Investigation and Detection Group (CIDG) tungod sa giingong pagpanghadlok kanila atol sa nahitabong raid sa ilang buhatan niadtong Lunes sa gabii.

Ang legal counsel sa maong establisemento, Atty. Dominador Café mibutyag sa diha nga nahinabi sa mga tigbalita kagahapon sa buntag nga adunay pipila ka trabahante ang giingong nagplanong moduso og kaso tungod sa kahadlok nga ilang natagamtaman sa mga kamot sa CIDG.

Dugang pa ni Café nga dili sila makabuot sa ilang mga trabahante kung sila mopasaka og tagsatagsa nila ka reklamo ug igo ra silang mosuporta.

Giklaro usab ni Café nga wala siyay aligutgot ngadto sa kapolisan human sa maong insidente. Si Café diriyot dakpa tungod sa pag-insister niini nga tugutang makagawas ang mga trabahante tungod kay wala silay labot sa gi-search base sa mando sa korte.

Si CIDG Regional Director Jose Pante mibutyag nga andam silang moatubang sa bisan unsang klase sa kaso tungod usab kay igo ra sila mihimo sa ilang trabaho.

Gipahigayon ang search operation sa CIDG-7 ug CIDG-Manila tungod sa reklamo sa Pfizer nga ang maong kompanya nagbaligya og pekeng Viagra. Ang Pfizer maoy tiggama og Viagra. (BANAT NEWS)