Kaso ni Gov. Garcia

CEBU, Philippines - Gipasakaan na kagahapon og kaso sa buhatan sa Ombudsman ngadto sa Sandiganbayan si Gob. Gwendolyn Garcia may kalambigitan sa giingong anomalosong pagpalit sa yuta sa mga Balili sa dakbayan sa Naga niadtong 2008 balor og dul-an sa P100 milyones.

Sa balita sa Rappler.com nagkanayon nga si Garcia gipasakaan og duha ka kasong anti-graft ug usa ka kasong technical malversation.

Ang buhatan sa Ombudsman mirekomendar og piyansa balor og P30,000 matag usa ka kaso alang sa temporaryong kagawasan ni Garcia. Si Garcia nitambong sa tigum sa United Nationalist Alliance (UNA) sa Manila kagahapon atol sa pagpasaka sa kaso. Gihulagway ni Garcia nga usa ka "political harassment" ang gihimo sa Ombudsman.

"It really is a rather surprising turn of events. It would not seem to look as though this is totally an innocent move. Alam naman natin we are now right in the middle of what is beginning to be a political season. These kinds of moves certainly will bring up suspicion of possible political harassment,” matud pa ni Garcia.

Si Garcia modagan pagka-senador sunod tuig ubos sa UNA. Wala pa matino kung kinsa pa ang laing opisyal sa Kapitolyo nga kauban ni Garcia nga gipasakaan og kaso.

Ang pagtoo ni Garcia gidasonan usab sa iyang abogado ug consultant sa Kapitolyo nga si Atty. Rory Jon Sepulveda.

“Governor Garcia’s surge in the Senatoriable rankings, the rising national interest and awareness of her political intentions, and the apparent prior knowledge of a politician who have no official participation or role in the process, make us here in 1Cebu believe that the filing (and the timing of the filing) of the three Information is political harassment,” matud pa ni Sepulveda sa text message nga gipadangat sa The Freeman/Banat News.

Sayo niini ang kaaway ni Garcia nga si Rep. Tomas Osmeña mipahibawo nga taligawas na ang kamandoan sa pagpasuspenso sa gobernador may kalabutan sa maong kaso. Apan kagahapon atol sa interbyu sa TV Patrol Central Visayas giklaro ni Deputy Ombudsman for the Visayas Pelagio Apostol nga wala pa sila kadawat sa maong impormasyon gikan sa kaulohan. (BANAT NEWS)