Thermometer
CEBU, Philippines - 1836— Unsa kahay gama sa mga doktor kung ang thermometer karon nga gigamit sa pagsukod sa kainiton sa temperature sa lawas sa tawo usa ka tiil ang gitas-on ug 20-minutos pa mahibaw-an ang resulta kung wala ipanganak ang English physician nga si Sir Thomas Clifford Allbutt. Si Allbutt maoy miembento sa labing unang ‘short clinical thermometer’ niadtong 1866 human niya makita nga taas kaayo ug dugay makuha ang temperatura sa mga pasyenteng iyang giatiman gamit ang karaang thermometer. Gawas sa thermometer dako siya og natampo sa pamaagi pagtambal sa mga sakit sa kasingkasing ilabi na sa coronary artery.
Mars landing
1976—Mitugpa ang US "Viking I Lander" spacecraft sa planetang Mars. Ang maong spacecraft gipalupad niadtong Agosto 20,1975 ug malampusong mitugpa Hulyo 20,1976 sa lugar sa Mars nga gipanganlan sa mga US space experts nga Chryse Planitia. Gikan didto nakapadala na ang maong spacecraft og mga hulagway sa palibot ug mikuha og mga sample sa bato ug yuta sa maong lugar.
‘Moon walk’ sa tawo
1969—Sa labing unang higayon, nakatunob ang tawo sa bulan. Ang Apollo XI mission nga giluwanan sa mga US astronauts nga sila si Neil Armstrong ug Edwin “Buzz” Aldrin maoy nahimong unang tawo nga nakatunob sa bulan diha sa dapit nga gitawag Sea of Tranquility. Silang duha maoy miestablisar sa Tranquility Base samtang si Michael Collins nagpalutawlutaw sa ibabaw sa kawanangan sa buwan. Sa unang pagtamak ni Armstrong kini namulong "That's one small step for a man, one giant leap for mankind." Ang maong hitabo nasaksihan sa gibanabanang 700 milyones ka tawo nga nagtan-aw sa telebisyon. (BANAT NEWS)