Totol modagan sa South District

CEBU, Philippines - Pormal nang gipahibawo ni kanhi Department of Transportation and Communication Undersecretary Arestotle “Totol” Batuhan ang pagpapili niya pagkakongresista sa south district sa siyudad sa Sugbo sa eleksyon sunod tuig.

Kini bisan pa man og dili siya maoy suportahan sa Bando Osmeña Pundok Kauswagan (BOPK) ni Kongresista Tomas Osmeña kinsa mipahibalong si Konsehal Rodrigo Abellanosa ang ilang kandidato atbang ni kanhi kongresista Tony Cuenco nga kandidato ni Mayor Michael Rama.

Apan matud ni Batuhan sa Banat News siguro na siyang magpapili pagka kongresista ubos sa Liberal Party ni Presidente Benigno Aquino III.

Pagkakarun gibutyag ni Batuhan nga nagsige na siya og suroy sa kabarangayan sa South District matag semana aron pagpakighimamat sa iyang mga kanhi lider kaniadto ug sangga sa politika.

Dugang ni Batuhan nga human unya sa filing sa certificate of candidacy sa Oktubre motutok na siya sa pagpalig-on sa iyang kandidatura sa umaabot eleksyon.

Giklaro ni Batuhan nga wala hinuon siya masurpresa kun si Abellanosa ang gipili sa BOPK tungod kay sakop man daan kini sa maong partido. (BANAT NEWS)