Tangke sa tubig-uwan ipataud sa matag balay

CEBU, Philippines - Naglaraw   ang Department of Science and Technology (DOST)7 nga isugyot ngadto sa lokal nga kagamhanan nga ibalaod nga matag balay ilabi na sa mga dagkong edipisyo magbaton og kaugalingong pundohanan sa tubig sa uwan aron kalikayan ang pagbaha ug paglunop sa kadalanan ning siyudad sa panahon sa ting-uwan.

Si Regional Director Rene Burt N. Llanto sa DOST7 atol sa Kapihan sa PIA nga gipalanog usab sa DYMR kagahapon sa buntag nagkanayon nga mao lamang kini ang bugtong solusyon niining nagka-grabi nga problema sa lunop inig bundak sa uwan dinhi sulod sa dakbayan.

Matud pa ni Llanto nga ang DOST daghan kaayo og mga teknolohiya sa tanang aspeto ug anggolo dili lamang   sa panginabuhi kundili bisan sa gikinahanglan sa kalikopan.

Ang paglunop sa kadalanan sa dakbayan sa Sugbo matag bundak sa kusog nga uwan maoy nag-unang suliran nga wala masulbad.

Dili lamang kadalanan kundi bisan ang pipila ka mga subdivision kansang mga tag-iya naglikay sa pagbubo og dugang gasto sa paghan-ay sa sistema sa drainage o imbornal.

Apan kun ang DOST maoy moplastar sa teknolohiya aron nga dili kaayo makadaghan ang tubig sa uwan ngadto sa kadalanan, walay laing ikasugyot niini gawas sa pagkinahanglan nga matag balay ilabi na ang dagkong mga building may kaugalingong water catchment mahimong baril o kaha sementadong kahon aron pagsipong   sa tubig sa uwan nga mobundak sa ilang atop ug dili na kini makadahili ngadto sa mga karsada ug bisan sa kasapaan ning dakbayan.

Unya ang maong tubig magamit kaayo sa tagbalay alang sa tanang kagamitan niini sama sa panglaba, panghugas sa sakyanan, bubo sa mga tanom ug tanang panginahanglan sa panimalay.

Gisukit kun kanus-a nila kini ipursiger pagpatuman sa lokal nga kagamhanan, si Llanto wala pa motakda og panahon.

Matud pa niya nga ang suliran bahin sa baha ug lunop panahon sa ting-uwan lisud nga masulbad kun kuwang og kuwarta ang lokal nga kagamhanan alang niini. Nasayud si Llanto nga dugay na siyang nakamatikod nga ang mga dakbayan sa Mandaue, Talisay ug Cebu pulos na may kompletong drainage plan apan ang pangutana kun ila na ba kining giimplementar, ang tubag mao nga wala pa.

(BANAT NEWS)