Katekista sikop tungod sa paglugos sa unom ka bata

CEBU, Philippines - Usa ka katikistang mahuyang ang gidakop pinasikad sa warrant of arrest tungod sa kasong pagpanglugos ug pagmolestiya og pito ka batang iyang mga tinun-an sa katekismo niadtong tuig 2000.

Ang nasikop mao si Raymond Lim, lumad nga taga barangay Rizal, San Carlos City ug kasamtangang nagpuyo sa iyang iyaan sa dalan Urgello barangay Sambag Uno dakbayan sa Sugbo.

Sa pakighinabi sa Banat News sa hepe sa kapolisan sa City Intelligence Branch sa Cebu City Police Office,Supt. Romeo Santander mibutyag nga sa milabay’ng semana nila nadawat ang impormasyon nga si Lim anha magtago sa Sambag Uno.

Ang suspek kusganong mihimakak sa pasangil batok kaniya bisan pa man sa gipagawas nga warrant of arrest ni RTC,6th Judicial Region Branch 58 Judge Abraham Caña sa San Carlos City nga five counts of rape ug usa ka kasong acts of lasciviousness.

Nasayran usab ni Santander nga niadtong buwan sa Enero pa nang tuiga naabot si Lim diha sa iyang iyaan.

Ang hepe sa kapolisan sa San Carlos City Police nga si Supt. Roman Illos, mibutyag sa Banat News nga upat ka batang babaye ug duha ang lalaki ang biktima ni Lim nga nagpangidaron pa kaniadto og 7-anyos ug karon mga 18-anyos na.

Ang suspek dad-on og balik ni Illos ngadto sa San Carlos City aron ipresentar sa korte. (BANAT NEWS)