Simbahan gilungkab

CEBU, Philippines - Bisan simbahan wala palabya sa mga kawatan human ang Shrine of St. James de Apostle sa Barangay Poblacion sa lungsod sa Compostela gikawatan og gibana-banang P200,000 nga kantidad sa mga gamit niadtong Lunes sa sayong buntag.

Usa sa mga caretaker nakabantay nga nahanaw ang Yamaha amplifier nga mokabat sa P100,000; Sakura amplifier P5,000; ug duha ka Yamaha equalizer nga mokantidad sa P50,000 nianang Lunes sa buntag. Matud pa ni PO2 Arbi Goc-ong, imbestigador sa Compostela Police Station, nga mga 5:00 sa buntag nag-prepara unta sa unang misa ni Fr. Reynante Beltran ang maong caretaker dihang namatikdan niya nga nawala na ang maong mga butang.

Si Goc-ong midugang nga posible mga alas 3:00 sa buntag nahitabo ang pagpangawat. Sa imbestigasyon sa kapulisan, ang mga kawatan posibleng nakasulod sa compound sa simbahan pinaagi sa pagkatkat sa kural niini.

Giguba usab ang pultahan sa luyong bahin pinaagi sa paglugit sa doorknob gamit ang usa ka mahait nga butang samtang nangatulog sa luyong bahin sa simbahan ang upat ka mga caretakers nga wala makamatikod. (BANAT NEWS)